ମନ୍ତ୍ରୀପରିଷଦ ବୈଠକରେ ମୋଦୀଙ୍କ ପରାମର୍ଶ, ‘ବୁଝି ବିଚାରି ମନ୍ତବ୍ୟ ଦିଅ, ବିବାଦରୁ ଦୂରେଇ ରୁହ’ – Sahana Mela

ନୂଆଦିଲ୍ଲୀ: ଲୋକସଭା ନିର୍ବାଚନ ପାଇଁ ପ୍ରସ୍ତୁତି ଚାଲିଥିବା ବେଳେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ରବିବାର କେନ୍ଦ୍ର ମନ୍ତ୍ରୀମାନଙ୍କୁ କଡ଼ା ନିର୍ଦ୍ଦେଶ ଦେଇଛନ୍ତି। ପ୍ରଧାନମନ୍ତ୍ରୀ ମୋଦୀ ମନ୍ତ୍ରୀମାନଙ୍କୁ ଭାବିଚିନ୍ତି ବୟାନ ଦେବାକୁ ଏବଂ ବିବାଦୀୟ ମନ୍ତବ୍ୟରୁ ଦୂରେଇ ରହିବାକୁ କହିଛନ୍ତି।

ମନ୍ତ୍ରିମଣ୍ଡଳ ବୈଠକରେ ପ୍ରଧାନମନ୍ତ୍ରୀ ମୋଦୀ ମନ୍ତ୍ରୀମାନଙ୍କୁ ଏହା ମଧ୍ୟ କହିଛନ୍ତି ଯେ ସେମାନଙ୍କୁ ସରକାରଙ୍କ ଯୋଜନା ବିଷୟରେ ଲୋକଙ୍କୁ ଅବଗତ କରିବାକୁ ପଡିବ । ଲୋକସଭା ନିର୍ବାଚନ ପ୍ରଚାର ସମୟରେ ସରକାର କରିଥିବା ବିକାଶ ମୂଳକ କାର୍ଯ୍ୟକୁ ମଧ୍ୟ ଲୋକଙ୍କ ସାମ୍ନାରେ ଉଲ୍ଲେଖ କରିବା ଉଚିତ।

ମେ’ ମାସରେ ନୂଆ ସରକାର ଗଠନ ପରେ ତୁରନ୍ତ ପଦକ୍ଷେପ ନେବାକୁ ୧୦୦ ଦିନିଆ କାର୍ଯ୍ୟସୂଚୀକୁ ଶୀଘ୍ର କାର୍ଯ୍ୟକାରୀ କରିବା ନେଇ ମନ୍ତ୍ରିପରିଷଦ ବୈଠକରେ ଆଲୋଚନା ହୋଇଥିଲା। ଏଥିସହ ଆସନ୍ତା ୫ ବର୍ଷ ପାଇଁ ଲକ୍ଷ୍ୟ ଧାର୍ଯ୍ୟ କରାଯାଇଛି। ୨୦୪୭ ସୁଦ୍ଧା ଭାରତ କିପରି ବିକଶିତ ହେବ? ଏ ନେଇ ସମସ୍ତ ମନ୍ତ୍ରଣାଳୟ ପକ୍ଷରୁ ପାୱାର ପଏଣ୍ଟ ପ୍ରେଜେଣ୍ଟେସନ୍ ଦିଆଯାଇଥିଲା।

ଲୋକସଭା ନିର୍ବାଚନ ତାରିଖ ଘୋଷଣା ପୂର୍ବରୁ ବୋଧହୁଏ ଏହା ହେଉଛି ଶେଷ ବୈଠକ। ଶନିବାର (ମାର୍ଚ୍ଚ ୨) ବିଜେପି ୧୯୫ ପ୍ରାର୍ଥୀଙ୍କ ପ୍ରଥମ ତାଲିକା ପ୍ରକାଶ କରିଥିବା ବେଳେ ଏହି ବୈଠକ ଅନୁଷ୍ଠିତ ହୋଇଛି।