ଭୁବନେଶ୍ୱର ମହାନଗର ନିଗମର ସଫଳ ଡେଙ୍ଗୁ ଦମନ : ଦୀର୍ଘ ଦିନ ବର୍ଷା ସତ୍ୱେ ଡେଙ୍ଗୁ ରୋଗୀ ସଂଖ୍ୟା ଆଶାତୀତ ଭାବେ ହ୍ରାସ…

ଭୁବନେଶ୍ୱର:- ଭୁବନେଶ୍ୱର ମହାନଗର ନିଗମ(ବିଏମ୍ ସି) ପକ୍ଷରୁ ଡେଙ୍ଗୁ ଦମନ ପାଇଁ ନିଆଯାଇଥିବା ବିଭିନ୍ନ ପଦକ୍ଷେପ ଯୋଗୁ ଚଳିତ ବର୍ଷ ଦୀର୍ଘ ଦିନ ଧରି ବର୍ଷା ଲାଗିରହିଥିଲେ ମଧ୍ୟ ଡେଙ୍ଗୁ ରୋଗୀ ସଂଖ୍ୟା ଆଶାତୀତ ଭାବେ ହ୍ରାସ ପାଇଛି । ଗତ ବର୍ଷ ଭୁବନେଶ୍ୱରରେ ଅକ୍ଟୋବର ମାସ ଶେଷ ସୁଦ୍ଧା 1235 ଡେଙ୍ଗୁ ରୋଗୀ ଚିହ୍ନଟ ହୋଇଥିବା ବେଳେ ଚଳିତ ବର୍ଷ ଆଜି ସୁଦ୍ଧା ମାତ୍ର 311 ଜଣ ଡେଙ୍ଗୁ ରୋଗୀଙ୍କୁ ଚିହ୍ନଟ କରାଯାଇଛି ।

ଚଳିତ ବର୍ଷ ଏପରି ଆଶାତୀତ ଭାବେ ଡେଙ୍ଗୁରୋଗୀ ସଂଖ୍ୟା ହ୍ରାସ ପାଇବାର ମୁଖ୍ୟ କାରଣ ହେଲା ଆମର କ୍ଷେତ୍ର କର୍ମୀ ଯଥା-ଆଶା, ଅଙ୍ଗନବାଡି କର୍ମୀ, ସ୍ୱଚ୍ଛସାଥୀ, ସ୍ୱଚ୍ଛ ସୁପରଭାଇଜର, ସ୍ୱେଚ୍ଛାସେବୀ ଇତ୍ୟାଦିଙ୍କ ମାଧ୍ୟମରେ ଘର ଘର ଜନ ସଚେତନତା ସୃଷ୍ଟି । ପ୍ରତି ୱାର୍ଡରେ ଅଧିକାରୀ ଓ କର୍ପୋରେଟରଙ୍କ ସଂଯୋଜନାରେ ସଭା, ଶୋଭାଯାତ୍ରା, ଲିଫଲେଟ୍ ବଣ୍ଟନ, ପ୍ରଚାର, ପ୍ରସାର, ଡ୍ରାଏ ଡେ ପାଳନ କରିବା, 296ଟି ବିଦ୍ୟାଳୟ ଓ ମହାବିଦ୍ୟାଳୟରେ ଛାତ୍ରଛାତ୍ରୀମାନଙ୍କୁ ସଚେତନ କରାଇବା ଆଦି କାର୍ଯ୍ୟକ୍ରମ କରାଯାଇଛି । ଚଳିତି ବର୍ଷ ଆମର ସ୍ୱେଚ୍ଛାସେବୀମାନେ ଡେଙ୍ଗୁ ବାବଦରେ 3 ଲକ୍ଷ 81 ହଜାର 8 ପରିବାରଙ୍କୁ ଭେଟି ସେମାନଙ୍କୁ ସଚେତନ କରାଇଛନ୍ତି । ଅର୍ଥାତ 11 ଲକ୍ଷ 86 ହଜାର 36 ଜନ ସଂଖ୍ୟା ଅଂଚଳରେ ଲୋକମାନଙ୍କୁ ଡେଙ୍ଗୁର ଭୟାବହତା ସଂପର୍କରେ ସଚେତନ କରାଯାଇଛି । ବିଏମ୍ ସି ପକ୍ଷରୁ 91ହଜାର 825ଟି ମଶା ଅଣ୍ଡାଦେବା ସ୍ଥାନ ବା ଉତ୍ସକୁ ନଷ୍ଟ କରାଯାଇଛି । ଏହା ବ୍ୟତୀତ ମଶା ଧୁଆଁ ଦେବା, ଘାସ କାଟିବା, ବାହାରେ ପଡିଥିବା ଟାୟାର ଓ ପାଣି ଜମି ରହୁଥିବା ବିଭିନ୍ନ ପାତ୍ର ହଟାଇବା ଆଦି କାର୍ଯ୍ୟକୁ ସଠିକ ଭାବେ କାର୍ଯ୍ୟକାରୀ କରିବା ଦ୍ୱାରା ଏହା ସମ୍ଭବ ହୋଇପାରିଛି ବୋଲି ବିଏମ୍ ସି ପକ୍ଷରୁ କୁହାଯାଇଛି ।

ସାଧାରଣତଃ ଅଗଷ୍ଟ ଓ ସେପ୍ଟେମ୍ବର ମାସରେ ଅଧିକ ଡେଙ୍ଗୁରୋଗୀ ଚିହ୍ନଟ ହୋଇଥାନ୍ତି । ଗତ ବର୍ଷ  ଅଗଷ୍ଟ ମାସରେ 674 ଏବଂ ସେପ୍ଟେମ୍ବର ମାସରେ 673 ଜଣ ଡେଙ୍ଗୁ ରୋଗୀ ଚିହ୍ନଟ ହୋଇଥିବା ବେଳେ ଚଳିତ ବର୍ଷ ଏହି ଦୁଇମାସରେ ଯଥାକ୍ରମେ 64 ଓ 25 ଜଣ ଡେଙ୍ଗୁ ରୋଗୀ ଚିହ୍ନଟ ହୋଇଛନ୍ତି । ଗତ ବର୍ଷ ଅକ୍ଟୋବର ମାସସୁଦ୍ଧା ମୋଟ 29 ହଜାର 381 ଟି ରକ୍ତ ନମୂନା ପରୀକ୍ଷା କରାଯାଇଥିବା ବେଳେ ଚଳିତ ବର୍ଷ ଅକ୍ଟୋବର 23 ତାରିଖ ସୁଦ୍ଧା 26 ହଜାର 37ଟି ରକ୍ତ ନମୂନା ପରୀକ୍ଷା କରାଯାଇଛି ।

ଆଗାମୀ ଦିନରେ ଭୁବନେଶ୍ୱର ମହାନଗର ଅଂଚଳରୁ ସଂପୂର୍ଣ୍ଣ ଭାବେ ଡେଙ୍ଗୁ ମଶା ବଂଶ ନାଶ କରିବା ସହ ସହରକୁ ଡେଙ୍ଗୁ ମୁକ୍ତ କରିବା ପାଇଁ ପ୍ରୟାସ ଜାରି ରହିବ ବୋଲି ବିଏମ୍ ସି ପକ୍ଷରୁ କୁହାଯାଇଛି ।