ରାଜ୍ୟ

ଓଡ଼ିଶାବାସୀଙ୍କୁ ଆଶ୍ୱସ୍ତି: ବାତ୍ୟା ‘ଅକ୍ୱାନ୍’ ପରେ ବନ୍ୟା ଭୟ ନାହିଁ

ଭୁବନେଶ୍ୱର: ବାତ୍ୟା ‘ଅକୱାନ’ ପ୍ରଭାବରେ ରାଜ୍ୟର ବିଭିନ୍ନ ଜିଲ୍ଲାରେ ବର୍ଷା ହୋଇଥିଲେ ମଧ୍ୟ ଏବେ ବନ୍ୟା ଆଶଙ୍କା ନାହିଁ। ରାଜ୍ୟର କୌଣସି ଅଞ୍ଚଳରେ ବର୍ତ୍ତମାନ ବନ୍ୟା ପରିସ୍ଥିତି ଉପୁଜିନାହିଁ। ଏପରିକି ଆଗାମୀ କିଛି ଦିନ ମଧ୍ୟରେ ନଦୀଗୁଡ଼ିକର ଜଳସ୍ତର ବିପଦ ସଙ୍କେତ ଅତିକ୍ରମ କରିବାର ସମ୍ଭାବନା ମଧ୍ୟ କମ୍ ରହିଛି। ଏଭଳି ଆଶ୍ୱସ୍ତିକର ସୂଚନା ଦେଇଛନ୍ତି ଜଳସମ୍ପଦ ବିଭାଗର ସର୍ବୋଚ୍ଚ ଯନ୍ତ୍ରୀ ଦିଲୀପ ରାଉତ।

ଗଞ୍ଜାମରେ ସର୍ବାଧିକ ୧୧୯ ମିମି ବର୍ଷା

ବାତ୍ୟା ‘ଅକୱାନ’ର ପ୍ରଭାବରେ ରାଜ୍ୟର ଅନେକ ଜିଲ୍ଲାରେ ବର୍ଷା ରେକର୍ଡ ହୋଇଛି। ଗଞ୍ଜାମ ଜିଲ୍ଲାରେ ସର୍ବାଧିକ ୧୧୯ ମିଲିମିଟର ବର୍ଷା ହୋଇଥିବା ବେଳେ ପୁରୀରେ ୬୧ ମିଲିମିଟର ବର୍ଷା ହୋଇଛି। ଏହାବ୍ୟତୀତ କେନ୍ଦ୍ରାପଡ଼ା ଓ ଭଦ୍ରକ ଜିଲ୍ଲାରେ ମଧ୍ୟ ବର୍ଷା ହୋଇଥିବା ଜଣାପଡ଼ିଛି।

ଋଷିକୁଲ୍ୟାରେ ବଢ଼ୁଛି ଜଳସ୍ତର, ତଥାପି ବନ୍ୟା ଆଶଙ୍କା ନାହିଁ

ବର୍ଷା ଯୋଗୁଁ ଋଷିକୁଲ୍ୟା ନଦୀର ଜଳସ୍ତର ବୃଦ୍ଧି ପାଇଛି। ଶୁକ୍ରବାର ସନ୍ଧ୍ୟା ସୁଦ୍ଧା ନଦୀର ଜଳସ୍ତର ଆହୁରି ବଢ଼ିବାର ସମ୍ଭାବନା ରହିଛି। ତେବେ ଏହା ବିପଦ ସଙ୍କେତ ଅତିକ୍ରମ କରିବାର ଆଶଙ୍କା ନଥିବା ଜଳସମ୍ପଦ ବିଭାଗର ସର୍ବୋଚ୍ଚ ଯନ୍ତ୍ରୀ ଦିଲୀପ ରାଉତ ସ୍ପଷ୍ଟ କରିଛନ୍ତି।

ଡ୍ୟାମ୍‌ରୁ ଜଳ ନିଷ୍କାସନ ବନ୍ଦ, ବର୍ଷାଜଳ ସଂରକ୍ଷଣ

ବାତ୍ୟାର ଆଗମନ ପୂର୍ବରୁ ସମ୍ଭାବ୍ୟ ବନ୍ୟା ସ୍ଥିତିକୁ ଏଡ଼ାଇବା ପାଇଁ ସତର୍କତାମୂଳକ ପଦକ୍ଷେପ ସ୍ୱରୂପ ବିଭିନ୍ନ ଡ୍ୟାମ୍‌ରୁ ପ୍ରାୟ ୫୦ ପ୍ରତିଶତ ଜଳ ନିଷ୍କାସନ କରାଯାଇଥିଲା। ତେବେ ବର୍ତ୍ତମାନ ସମସ୍ତ ଡ୍ୟାମ୍‌ରୁ ଜଳ ଛଡ଼ାଯିବା ବନ୍ଦ ରହିଛି। କୌଣସି ଜଳଭଣ୍ଡାରରୁ ଏବେ ପାଣି ନିଷ୍କାସନ କରାଯାଉନାହିଁ। ବର୍ଷା ଜଳକୁ ଜଳଭଣ୍ଡାରରେ ସଂରକ୍ଷିତ ରଖାଯାଉଥିବା ବିଭାଗ ପକ୍ଷରୁ କୁହାଯାଇଛି।

ଝାଡ଼ଖଣ୍ଡରୁ ଜଳ ଓଡ଼ିଶାରେ ପହଞ୍ଚିବାକୁ ଲାଗିବ ୩ ଦିନ

ଓଡ଼ିଶାର ନଦୀଗୁଡ଼ିକରେ ବନ୍ୟା ଆଶଙ୍କା କମ୍ ରହିବାର ଅନ୍ୟତମ କାରଣ ହେଉଛି ନଦୀଗୁଡ଼ିକର ଉପରମୁଣ୍ଡରେ ବର୍ତ୍ତମାନ ସୁଦ୍ଧା ପ୍ରବଳ ବର୍ଷା ହୋଇନାହିଁ। ଜଳସମ୍ପଦ ବିଭାଗର ସର୍ବୋଚ୍ଚ ଯନ୍ତ୍ରୀ ଦିଲୀପ ରାଉତଙ୍କ ସୂଚନା ଅନୁଯାୟୀ, ଝାଡ଼ଖଣ୍ଡରେ ବର୍ଷା ହେଲେ ମଧ୍ୟ ସେଠାରୁ ନଦୀ ଜଳ ଓଡ଼ିଶାରେ ପହଞ୍ଚିବାକୁ ପ୍ରାୟ ୩ ଦିନ ସମୟ ଲାଗିବ। ଫଳରେ ଏହି ସମୟ ମଧ୍ୟରେ ବିଭାଗ ପରିସ୍ଥିତି ଉପରେ ନଜର ରଖି ଆବଶ୍ୟକ ପ୍ରତିଷେଧମୂଳକ ପଦକ୍ଷେପ ଗ୍ରହଣ କରିପାରିବ।

ହାଇ ଆଲର୍ଟରେ ଜଳସମ୍ପଦ ବିଭାଗ

ସମ୍ଭାବ୍ୟ ସ୍ଥିତିକୁ ଦୃଷ୍ଟିରେ ରଖି ଜଳସମ୍ପଦ ବିଭାଗର ଇଞ୍ଜିନିୟର ଓ ଅଧିକାରୀମାନଙ୍କୁ ହାଇ ଆଲର୍ଟରେ ରଖାଯାଇଛି। ନଦୀଗୁଡ଼ିକର ଜଳସ୍ତର, ଜଳଭଣ୍ଡାରର ସ୍ଥିତି ଏବଂ ଅନ୍ୟାନ୍ୟ ଜଳସମ୍ପଦ ସମ୍ପର୍କିତ ପରିସ୍ଥିତି ଉପରେ ନିୟମିତ ନଜର ରଖାଯାଉଛି। ବର୍ଷାର ପରିମାଣ ଓ ନଦୀ ଜଳସ୍ତରରେ ପରିବର୍ତ୍ତନକୁ ଦେଖି ଆଗକୁ ଆବଶ୍ୟକ ପଦକ୍ଷେପ ନିଆଯିବ ବୋଲି ବିଭାଗ ପକ୍ଷରୁ ଆଶ୍ୱସ୍ତ କରାଯାଇଛି।

Leave a Reply

Your email address will not be published. Required fields are marked *

Back to top button