[ad_1]
ନୂଆଦିଲ୍ଲୀ: ଅଭିନେତ୍ରୀ ରଶ୍ମିକା ମନ୍ଦନାଙ୍କ ଡିପଫେକ୍ ଭିଡିଓକୁ ନେଇ ଏବେ ଚାରିଆଡେ ଚର୍ଚ୍ଚା । ଏନେଇ ଆଜି ଦିଲ୍ଲୀ ପୋଲିସ ଅଜଣା ବ୍ୟକ୍ତିଙ୍କ ବିରୋଧରେ ଏକ ଏଫଆଇଆର ପଞ୍ଜିକରଣ କରିଛି । ଏହି ମାମଲାରେ ଦିଲ୍ଲୀ ପୋଲିସ୍ ଆଇପିସିର ଧାରା ୪୬୫, ୪୬୯ ଏବଂ ଆଇଟି ଆକ୍ଟର ଧାରା ୬୬C ଓ ୬୬E ଅନୁଯାୟୀ ଏକ ମାମଲା ରୁଜୁ କରିଛି । ଏନେଇ ଦିଲ୍ଲୀ ପୋଲିସ ପକ୍ଷରୁ ସୂଚନା ଜାରି କରାଯାଇଛି ।
ସୂଚନା ଅନୁସାରେ, କିଛି ଦିନ ତଳେ ରଶ୍ମିକାଙ୍କ ଏହି ଡିପଫେକ୍ ଭିଡିଓ ଭାଇରାଲ ହୋଇଥିଲା । ଡିପଫେକ୍ (ନକଲି) ଭିଡିଓରେ ରଶ୍ମିକାଙ୍କୁ ଅତି ବୋଲ୍ଡ ଲୁକ୍ରେ ଦେଖିବାକୁ ମିଳିଥିଲା । ଭାଇରାଲ ଭିଡିଓଟି ବାସ୍ତବରେ ରଶ୍ମିକାଙ୍କ ନୁହଁ । ଏହି ଭିଡିଓଟି ଜାରା ପଟେଲ ନାମକ ଜଣେ ଯୁବତୀଙ୍କର ଥିଲା । ଯାହାକୁ ଏଡିଟ୍ କରାଯାଇ ତାଙ୍କ ମୁହଁ ପରିବର୍ତ୍ତେ ରଶ୍ମିକାଙ୍କ ମୁହଁ ଯୋଡ଼ା ଯାଇଥିଲା । ଏହି ଭିଡିଓ ଭାଇରାଲ ପରେ ସୋସିଆଲ ମିଡିଆରେ ହଇଚଇ ସୃଷ୍ଟି ହୋଇଥିଲା । ରଶ୍ମିକା ମନ୍ଦନାଙ୍କ ଡିପଫେକ୍ ଏଆଇ-ଜେନେରେଟେଡ୍ ଭିଡିଓ ସଂପର୍କରେ, ଆଇପିସି, ୧୮୬୦ ଏବଂ ଆଇଟି ଆକ୍ଟର ଧାରା ୪୬୫ ଏବଂ ୪୬୯ ଏବଂ ଆଇଟି ଅଧିନିୟମ, ୨୦୦୦ ର ବିଭାଗ ୬୬C ଏବଂ ୬୬E ଅଧୀନରେ ଏକ ମାମଲା ରୁଜୁ ହୋଇଛି ।
ଏହାପୂର୍ବରୁ ଦିଲ୍ଲୀ ମହିଳା ଆୟୋଗ ମଧ୍ୟ ରଶ୍ମିକା ମନ୍ଦନାଙ୍କ ଏହି ଫେକ୍ ଭିଡିଓ ସୋସିଆଲ ମିଡିଆରେ ଭାଇରାଲ ହେବା ପରେ କାର୍ଯ୍ୟାନୁଷ୍ଠାନ ଦାବି କରିଥିଲା । ଦିଲ୍ଲୀ ମହିଳା ଆୟୋଗ ରଶ୍ମିକା ମନ୍ଦନାଙ୍କ ଫେକ୍ ଭିଡିଓର ସୁ ମୋଟୁ କଗ୍ନିଜେସନ୍ ନେଇଛନ୍ତି। ଆୟୋଗ ଏକ ଏଫଆଇଆର ପଞ୍ଜୀକୃତ କରି ଗିରଫ ଦାବି କରିଛନ୍ତି। ନଭେମ୍ବର ୧୭ ସୁଦ୍ଧା ଏହି ମାମଲାରେ ଅଭିଯୁକ୍ତଙ୍କ ବିବରଣୀ ସହିତ ଏଫ୍ଆଇଆରର ଏକ କପି ମଧ୍ୟ ମାଙ୍ଗ କରାଯାଇଛି । ଦିଲ୍ଲୀ ପୋଲିସ ସମ୍ପୃକ୍ତ ବିଭାଗ ଅଧୀନରେ ଏଫ୍ଆଇଆର୍ ପଞ୍ଜୀକୃତ କରି ଘଟଣାର ତଦନ୍ତ ଆରମ୍ଭ କରିଛି।
ତେବେ ରଶ୍ମିକାଙ୍କ ପରେ ବଲିଉଡ ଅଭିନେତ୍ରୀ କ୍ୟାଟ୍ରିନା କୈଫ୍ ମଧ୍ୟ ଡିପଫେକ୍ର ଶିକାର ହୋଇଥିଲେ । ଟାଇଗର-3 ଫିଲ୍ମରେ କ୍ୟାଟ୍ରିନାଙ୍କ ଏକ ଫଟୋକୁ ଭିନ୍ନ ରୂପ ଦିଆଯାଇଥିଲା ।
[ad_2]
