[ad_1]
ମୁମ୍ବାଇ: ଭାରତୀୟ କ୍ରିକେଟ କଂଟ୍ରୋଲ ବୋର୍ଡ ସେକ୍ରେଟାରୀ ଜୟ ଶାହ ୨୦୨୪ ଟି୨୦ ବିଶ୍ୱକପରେ ରୋହିତ ଶର୍ମା ଦଳର ନେତୃତ୍ୱ ନେବେ ବୋଲି କହିଛନ୍ତି । ରାଜକୋଟରେ ଆୟୋଜିତ ଏକ ଇଭେଂଟରେ ସେ କହିଛନ୍ତି ଦିନିକିଆ ବିଶ୍ୱକପରେ ଭାରତୀୟ ଟିମ କ୍ରମାଗତ ୧୦ ମ୍ୟାଚ ଜିତି ଆମ ସମସ୍ତଙ୍କ ମନ ଜିଣିଥିଲା । ରୋହିତଙ୍କ ନେତୃତ୍ୱରେ ଆମେ ଫାଇନାଲ ହାରି ଯାଇଥିଲେ ମଧ୍ୟ ସମ୍ପୂର୍ଣ୍ଣ ଟୁର୍ଣ୍ଣାମେଂଟରେ ଭଲ ପ୍ରଦର୍ଶନ କରିଥିଲୁ । ମୋର ବିଶ୍ୱାସ ଭାରତ ରୋହିତଙ୍କ ନେତୃତ୍ୱରେ ବାରବୋଡସରେ ଟି୨୦ ବିଶ୍ୱକପ ଜିତିବ ବୋଲି ସେ କହିଛନ୍ତି ।
ଏହି ଅବସରରେ ହାର୍ଦ୍ଦିକ ପାଣ୍ଡ୍ୟା ଦଳର ଉପ ଅଧିନାୟକ ହେବେ ଏବଂ ବିରାଟ କୋହଲିଙ୍କ ଭୂମିକା ଖୁବ ଶୀଘ୍ର ସ୍ପଷ୍ଟ କରାଯିବ ବୋଲି ଶାହ କହିଛନ୍ତି । ଆଇପିଏଲ ଆଧାରରରେ ଖେଳାଳିଙ୍କୁ ଚୟନ କରାଯିବା ସମ୍ଭବପର ନୁହେଁ । ଏଥିପାଇଁ ସେମାନଙ୍କୁ ଘରୋଇ କ୍ରିକେଟ ଖେଳିବାକୁ ପଡିବ ବୋଲି ସେ ସ୍ପଷ୍ଟ କରିଛନ୍ତି । କୋହଲି ଇଂଲଣ୍ଡ ବିପକ୍ଷ ଟେଷ୍ଟ ସିରିଜ ନ ଖେଳିବା ନେଇ ସେ କହିଥିଲେ, ବିନା କାରଣରେ ସେ କ୍ରିକେଟଠାରୁ ଦୂରେଇ ରୁହନ୍ତି ନାହିଁ । ନିଶ୍ଚିତ ଭାବେ କିଛି ଅସୁବିଧା ହୋଇଛି । ଆମକୁ ଅପେକ୍ଷା କରିବାକୁ ପଡିବ ।
ମୁମ୍ବାଇ ଇଣ୍ଡିଆନ୍ସ ରୋହିତଙ୍କୁ ଅଧିନାୟକ ପଦରୁ ହଟାଇବା ପରେ ଟି୨୦ ବିଶ୍ୱକପରେ ତାଙ୍କ ନେତୃତ୍ୱ ନେଇ ସଂଶୟ ସୃଷ୍ଟି ହୋଇଥିଲା । ଏବେ ଶାହଙ୍କ ମୋହର ବାଜିବା ପରେ ରୋହିତ ନିଶ୍ଚିତ ଭାବେ ନିଜକୁ ଚାପମୁକ୍ତ ମନେ କରୁଥିବେ । ଟି୨୦ ବିଶ୍ୱକପ ୨୦୨୪ ୧ରୁ ୨୯ ଜୁନ ପର୍ଯ୍ୟନ୍ତ ୱେଷ୍ଟଇଣ୍ଡିଜ ଓ ଆମେରିକାରେ ଖେଳାଯିବ । ୱେଷ୍ଟଇଣ୍ଡିଜରେ ୪୧ ଓ ଆମେରିକାରେ ୧୪ ମ୍ୟାଚ ହେବ ।
[ad_2]
