ମୋଦୀ ସରକାରକୁ ନବୀନଙ୍କ ୧୦ରୁ ୮ ମାର୍କ: ୨୦୨୪ ନିର୍ବାଚନ ପୂର୍ବରୁ କାହାର ଲାଭ, କାହାର କ୍ଷତି? – Sahana Mela

ଭୁବନେଶ୍ୱର: ୨୦୨୪ରେ ହେବାକୁ ଥିବା ସାଧାରଣ ନିର୍ବାଚନ ପୂର୍ବରୁ ନବଗଠିତ ଇଣ୍ଡିଆ ମେଣ୍ଟ ଅପେକ୍ଷା ନରେନ୍ଦ୍ର ମୋଦୀଙ୍କ ନେତୃତ୍ୱାଧୀନ ଏମଡିଏ ମେଣ୍ଟକୁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ପରୋକ୍ଷରେ ସମର୍ଥନ ଦେଉଥିବା ସଙ୍କେତ ଦେଇଛନ୍ତି। ଯାହା ଓଡ଼ିଶାରେ ନିଜ ଦଳ ବିଜେପିକୁ ଶାସକ ବିଜେଡି ବିରୋଧରେ ଆକ୍ରମଣାତ୍ମକ ରଣନୀତିକୁ ହ୍ରାସ କରିବା ପାଇଁ ଏକ ଯୋଜନାବଦ୍ଧ ରଣନୀତିକୁ ସ୍ପଷ୍ଟ କରିଛି।

ରବିବାର ବିଜେଡି ସୁପ୍ରିମୋ ନବୀନ ପଟ୍ଟନାୟକ, ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କୁ ବିଦେଶ ନୀତି ଏବଂ ଦୁର୍ନୀତି ଦୂର କରିବା ପାଇଁ ତାଙ୍କ ପଦକ୍ଷେପ ପାଇଁ ପ୍ରଶଂସା କରିଥିଲେ। ଏବଂ ତାଙ୍କ ସରକାରକୁ ୧୦ରୁ ୮ ରେଟିଂ ଦେଇଥିଲେ। ଦ ନ୍ୟୁ ଇଣ୍ଡିଆନ ଏକ୍ସପ୍ରେସର ଏକ କାର୍ଯ୍ୟକ୍ରମରେ ସମ୍ପାଦକ ପ୍ରଭୁ ଚାଓ୍ୱାଲାଙ୍କ ପ୍ରଶ୍ନରେ ନବୀନ ପ୍ରତିକ୍ରିୟା ଦେବାକୁ ଯାଇ ଏପରି ଏକ ମାର୍କ ଦେଇଥିଲେ।

ଯେଉଁ ରେଟିଂ ବା ମାର୍କ ଦେଇଥିଲେ ତାହା ଓଡ଼ିଶାର ହିତରେ ବୋଲି କହି ତାଙ୍କ ସରକାର କେନ୍ଦ୍ର ସହ ସୌହାର୍ଦ୍ଦ୍ୟପୂର୍ଣ୍ଣ ସମ୍ପର୍କ ରଖିବାକୁ ରାଜି ବୋଲି କହିଥିଲେ। ସେ ଆହୁରି ମଧ୍ୟ କହିଛନ୍ତି, ରାଜ୍ୟର ବିକାଶରେ କେନ୍ଦ୍ର ସହଯୋଗୀ ହେବା ଜରୁରୀ।

୨୦୧୯ ପରଠାରୁ ନବୀନଙ୍କ ବିଜେଡିର ସମର୍ଥନ ଏନଡିଏ ସରକାର ପାଇଁ ଗୁରୁତ୍ୱପୂର୍ଣ୍ଣ ଥିଲା। ଯେଉଁଥିରେ ନିକଟରେ ସଂସଦରେ ଦିଲ୍ଲୀ ସର୍ଭିସ ବିଲ୍ ପାରିତ ହେବା ଏବଂ ମୋଦୀ ସରକାରଙ୍କ ବିରୋଧରେ ଅନାସ୍ଥା ପ୍ରସ୍ତାବ ମଧ୍ୟ ସାମିଲ ଥିଲା। ଫଳରେ ବିଜେଡି ବିଜେପି ଓ କଂଗ୍ରେସଠାରୁ ସମଦୂରତା ନୀତିକୁ ସ୍ବୀକାର କରୁଥିବା ବେଳେ ରଣକୌଶଳ ଦୃଷ୍ଟିରୁ ବିଜେଡି ବିଜେପି ଦଳ ପ୍ରତି ଅଧିକ ଆକୃଷ୍ଟ ହୋଇଛି।

ଏପରିକି ବିଜେପି ରାଷ୍ଟ୍ରୀୟ ନେତୃତ୍ୱ ମଧ୍ୟ ବିଜେଡିର ଆକ୍ରମଣରେ ଚୁପ୍ ହୋଇଯାଇଛନ୍ତି। ଯାହା ବିଜେପିର ଓଡ଼ିଶା ଶାଖାକୁ ପ୍ରମୁଖ ବିରୋଧୀ ଦଳ ହୋଇ ମଧ୍ୟ ନବୀନ ଆଣ୍ଡ୍ କୋ ବିରୋଧରେ ପୂରା ଦମରେ ନ ଯିବାକୁ ବାଧ୍ୟ କରିଛି।

ଯଦିଓ ବିରୋଧୀ ଦଳ ନେତା ଜୟନାରାୟଣ ମିଶ୍ର ଓ ଭୁବନେଶ୍ୱର ସାଂସଦ ଅପରାଜିତା ଷଡ଼ଙ୍ଗୀଙ୍କ ଭଳି କିଛି ରାଜ୍ୟ ବିଜେପି ନେତା ଅମଲାତନ୍ତ୍ରର ଆଧିପତ୍ୟକୁ ନେଇ ରାଜ୍ୟ ସରକାରଙ୍କୁ ଆକ୍ରମଣାତ୍ମକ ଢଙ୍ଗରେ ଟାର୍ଗେଟ କରୁଛନ୍ତି କିନ୍ତୁ କେନ୍ଦ୍ର ସ୍ୱରାଷ୍ଟ୍ର ମନ୍ତ୍ରୀ ଅମିତ ଶାହ, ଅଗଷ୍ଟ ୫ତାରିଖରେ ଓଡ଼ିଶା ଗସ୍ତରେ ଆସିଥିବା ବେଳେ ନବୀନଙ୍କୁ ମୁଖ୍ୟମନ୍ତ୍ରୀ ପ୍ରଶଂସା କରିବା ସହ ପ୍ରାକୃତିକ ବିପର୍ଯ୍ୟୟ ମୁକାବିଲାରେ ଅନ୍ୟ ରାଜ୍ୟକୁ ବାଟ ଦେଖାଇଥିବାରୁ ଏବଂ ରାଜ୍ୟରେ ମାଓବାଦୀଙ୍କ ପ୍ରଭାବ ହ୍ରାସ ପାଇଥିବାରୁ ତାଙ୍କ ସରକାରକୁ ପ୍ରଶଂସା କରିବା ରାଜ୍ୟରେ ପରୋକ୍ଷରେ ବିଜେପି ଶିବିରକୁ ପରୋକ୍ଷରେ ନିରୁତ୍ସାହିତ କରିଛି। ଏପରିକି ନବୀନଙ୍କ ଘନିଷ୍ଠ କୁହାଯାଉଥିବା ଆଇଏଏସ୍ ଅଫିସର ତଥା ୫-ଟି ସଚିବ ଭି. କେ. ପାଣ୍ଡିଆନଙ୍କ ସହ ଶାହାଙ୍କ ଆଲୋଚନା ଦୃଶ୍ୟ ମଧ୍ୟ ବିଜେପିର ଚାଲକୁ ପଦାରେ ପକାଇଛି।

ତେବେ ୨୦୨୪ରେ ବିଜେଡି ସହ ସମ୍ଭାବ୍ୟ ମେଣ୍ଟ ନେଇ ହେଉଥିବା କଳ୍ପନାଜଳ୍ପନାକୁ ବିଜେପି ଖଣ୍ଡନ କରିଛି। ଯାହାକୁ ନେଇ ଏବେ ପ୍ରଶ୍ନବାଚୀ ସୃଷ୍ଟି ହୋଇଛି ନବୀନଙ୍କ ସଦ୍ୟତମ ପ୍ରଶଂସା ପଛର ଉଦ୍ଦେଶ୍ୟ।