ଗୋଟିଏ ଦେଶ-ଗୋଟିଏ ନିର୍ବାଚନ ପାଇଁ ରାଷ୍ଟ୍ରପତିଙ୍କ ନିକଟରେ ରିପୋର୍ଟ ଦାଖଲ କଲେ କୋବିନ୍ଦ – Sahana Mela

ନୂଆଦିଲ୍ଲୀ: ଗୋଟିଏ ଦେଶ-ଗୋଟିଏ ନିର୍ବାଚନ ପାଇଁ ପୂର୍ବତନ ରାଷ୍ଟ୍ରପତି ରାମନାଥ କୋବିନ୍ଦଙ୍କ ଅଧ୍ୟକ୍ଷତାରେ ଗଠିତ ଉଚ୍ଚସ୍ତରୀୟ କମିଟି ରାଷ୍ଟ୍ରପତି ଦ୍ରୌପଦୀ ମୁର୍ମୁଙ୍କ ନିକଟରେ ରିପୋର୍ଟ ଦାଖଲ କରିଛି। କମିଟି ସଦସ୍ୟମାନେ ରାଷ୍ଟ୍ରୀୟ ଭବନକୁ ଯାଇ ରିପୋର୍ଟ ଦାଖଲ କରିଥିଲେ। ୱାନ ନେସନ ୱାନ ପୋଲ କମିଟି ୧୮ ହଜାର ୬୨୬ ପୃଷ୍ଠାର ଏକ ରିପୋର୍ଟ ପ୍ରସ୍ତୁତ କରିଛି। ୨୦୨୯ ରେ ଏକକାଳୀନ ନିର୍ବାଚନ କରିବାକୁ ଏହି ରିପୋର୍ଟ ସୁପାରିଶ କରିଛି।

ସେପ୍ଟେମ୍ବର ୨, ୨୦୨୩ ରେ ରାମନାଥ କୋବିନ୍ଦଙ୍କ ଅଧ୍ୟକ୍ଷତାରେ ଏହି କମିଟି ଗଠନ କରାଯାଇଥିଲା। ପୂର୍ବତନ ରାଷ୍ଟ୍ରପତି ରାମନାଥ କୋବିନ୍ଦଙ୍କ ନେତୃତ୍ୱରେ ଗତ ବର୍ଷ ସେପ୍ଟେମ୍ବର ୨ ରେ ଆଠ ଜଣ ସଦସ୍ୟ ନେଇ ଏକ କମିଟି ଗଠନ କରାଯାଇଥିଲା। ୱାନ ନେସନ ୱାନ ପୋଲ କମିଟିର ପ୍ରଥମ ବୈଠକ ୨୩ ସେପ୍ଟେମ୍ବର ୨୦୨୩ ଦିଲ୍ଲୀର ଯୋଧପୁର ଅଫିସର୍ ହଷ୍ଟେଲରେ ଅନୁଷ୍ଠିତ ହୋଇଥିଲା। ଏଥିରେ ପୂର୍ବତନ ରାଷ୍ଟ୍ରପତି ରାମନାଥ କୋବିନ୍ଦ, ଗୃହମନ୍ତ୍ରୀ ଅମିତ ଶାହା ଏବଂ ପୂର୍ବତନ ସାଂସଦ ଗୁଲାମ ନବୀ ଆଜାଦଙ୍କ ସମେତ ଆଠ ଜଣ ସଦସ୍ୟ ଅଛନ୍ତି। କେନ୍ଦ୍ର ଆଇନ ମନ୍ତ୍ରୀ ଅର୍ଜୁନ ରାମ ମେଘୱାଲଙ୍କୁ କମିଟିର ଏକ ସ୍ୱତନ୍ତ୍ର ସଦସ୍ୟ କରାଯାଇଛି।

ରିପୋର୍ଟରେ ୧୯୫୧-୫୨ ରୁ ୧୯୬୭ ମଧ୍ୟରେ ତିନୋଟି ନିର୍ବାଚନର ତଥ୍ୟ ବ୍ୟବହାର କରାଯାଇଥିଲା। ରିପୋର୍ଟରେ କୁହାଯାଇଛି ଯେ ଯଦି ସମସ୍ତ ପକ୍ଷ ଆଇନ ଆୟୋଗର ପ୍ରସ୍ତାବରେ ସହମତ ହୁଅନ୍ତି, ତେବେ ଏହା କେବଳ ୨୦୨୯ ରୁ କାର୍ଯ୍ୟକାରୀ ହେବ। ଏଥିସହ ଡିସେମ୍ବର ୨୦୨୬ ସୁଦ୍ଧା ୨୫ ଟି ରାଜ୍ୟରେ ବିଧାନସଭା ନିର୍ବାଚନ ହେବାକୁ ପଡିବ। ମଧ୍ୟପ୍ରଦେଶ, ରାଜସ୍ଥାନ, ତେଲେଙ୍ଗାନା, ଛତିଶଗଡ ଏବଂ ମିଜୋରାମ ବିଧାନସଭାର କାର୍ଯ୍ୟକାଳ ୬ ମାସ ପର୍ଯ୍ୟନ୍ତ ଜୁନ୍ ୨୦୨୯ ପର୍ଯ୍ୟନ୍ତ ବୃଦ୍ଧି କରାଯିବା ଉଚିତ୍। ଏହା ପରେ ସମସ୍ତ ରାଜ୍ୟରେ ଏକକାଳୀନ ବିଧାନସଭା ଓ ଲୋକସଭା ନିର୍ବାଚନ ଅନୁଷ୍ଠିତ ହୋଇପାରିବ।