ଅବକାରୀ ଦୁର୍ନୀତି ମାମଲା: ଗୋଆ ନିର୍ବାଚନରେ ଆପର ପାଣ୍ଠି ପରିଚାଳନା କରୁଥିବା ଚନପ୍ରୀତ ଗିରଫ – Sahana Mela

ନୂଆଦିଲ୍ଲୀ: ପ୍ରବର୍ତ୍ତନ ନିର୍ଦ୍ଦେଶାଳୟ (ଇଡି) ୨୦୨୨ ଗୋଆ ବିଧାନସଭା ନିର୍ବାଚନରେ ଆପର ପ୍ରଚାର ପାଇଁ ନଗଦ ପାଣ୍ଠି ପରିଚାଳନା କରିଥିବା ଅଭିଯୋଗରେ ଚନପ୍ରୀତ ସିଂହଙ୍କୁ ଦିଲ୍ଲୀ ଅବକାରୀ ନୀତି ସହ ଜଡ଼ିତ ମନି ଲଣ୍ଡରିଂ ମାମଲାରେ ଗିରଫ କରିଛି।

ଏପ୍ରିଲ ୧୨ ତାରିଖରେ ଚନପ୍ରୀତ ସିଂହଙ୍କୁ ପ୍ରିଭେନସନ ଅଫ୍ ମନି ଲଣ୍ଡରିଂ ଆକ୍ଟ (ପିଏମ୍ଏଲ୍ଏ) ଅଧୀନରେ ଗିରଫ କରାଯାଇଥିଲା ଏବଂ ପରଦିନ ତାଙ୍କୁ ସ୍ୱତନ୍ତ୍ର ଅଦାଲତରେ ହାଜର କରାଯାଇଥିଲା। କୋର୍ଟ ତାଙ୍କୁ ଏପ୍ରିଲ ୧୮ ତାରିଖ ପର୍ଯ୍ୟନ୍ତ ଇଡି ହେପାଜତକୁ ପଠାଇ ଦେଇଛନ୍ତି।

ଇଡି ଦ୍ୱାରା ଏହି ମାମଲାରେ ଏହା ହେଉଛି ୧୭ତମ ଗିରଫଦାରୀ। ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲ, ତାଙ୍କ ଦଳର ସହଯୋଗୀ ତଥା ଦିଲ୍ଲୀର ପୂର୍ବତନ ଉପ ମୁଖ୍ୟମନ୍ତ୍ରୀ ମନୀଷ ସିସୋଦିଆ, ବିଆରଏସ ନେତା କେ କବିତା ଏବଂ ଅନେକ ମଦ ବ୍ୟବସାୟୀ ଏବଂ ଅନ୍ୟମାନଙ୍କୁ ଇଡି ପୂର୍ବରୁ ଗିରଫ କରିସାରିଛି।

ପୂର୍ବରୁ ଏହି ମାମଲାରେ କେନ୍ଦ୍ରୀୟ ତଦନ୍ତ ବ୍ୟୁରୋ (ସିବିଆଇ) ସିଂହଙ୍କୁ ଗିରଫ କରିଥିଲା। ସିବିଆଇ ଏଫଆଇଆରରୁ ଏହି ମନି ଲଣ୍ଡରିଂ ମାମଲା ସାମ୍ନାକୁ ଆସିଛି।

୨୦୨୨ ଗୋଆ ନିର୍ବାଚନ ସମୟରେ ଆମ୍ ଆଦମୀ ପାର୍ଟି (ଆପ୍)ର ପ୍ରଚାର ପାଇଁ ଚନପ୍ରୀତ ସିଂହ ନଗଦ ଅର୍ଥ ପରିଚାଳନା କରିଥିଲେ ଏବଂ ବର୍ତ୍ତମାନ ଦିଲ୍ଲୀରେ କ୍ଷମତାରେଥିବା ରାଜନୈତିକ ସଂଗଠନ ସହ ତାଙ୍କର ‘ସମ୍ପର୍କ’ ଥିଲା ବୋଲି ଇଡି ଏହାର ସରକାରୀ ଦସ୍ତାବିଜ ମାଧ୍ୟମରେ ଅଦାଲତଙ୍କୁ ଜଣାଇଛି।