‘ଡନ୍’ ଫ୍ରାଞ୍ଚାଇଜ୍ର ଫିଲ୍ମଗୁଡ଼ିକୁ ନେଇ ଲୋକଙ୍କ ମଧ୍ୟରେ ବେଶ୍ ଉତ୍କଣ୍ଠା ରହିଛି। ଏହି ଫ୍ରାଞ୍ଚାଇଜ୍ର ଦୁଇଟି ଫିଲ୍ମ ଆସିସାରିଛି। ଏବେ ଏହାର ତୃତୀୟ ଫିଲ୍ମ ଆସିବ। ଫରହାନ୍ ଅଖତର ନିକଟରେ ‘ଡନ୍-୩’ ବିଷୟରେ ଘୋଷଣା କରିଥିଲେ। ଏଥିରେ ଲିଡ୍ ରୋଲରେ ରଣବୀର ସିଂହ ଓ କିଆରା ଆଡଭାନୀ ଦେଖାଯିବେ। ତେବେ ଏଯାବତ୍ ଏହାର ସୁଟିଂ ଆରମ୍ଭ ହୋଇପାରି ନାହିଁ।
ନିଜେ ଫରହାନ୍ ଫିଲ୍ମ ପାଇଁ ସମୟ ଦେଇପାରୁ ନାହାନ୍ତି। କାରଣ ସେ ଏବେ ‘୧୨୦ ବାହାଦୁର’ର ସୁଟିଂରେ ବ୍ୟସ୍ତ ଅଛନ୍ତି। ତେବେ ମାର୍ଚ୍ଚ, ୨୦୨୫ରେ ଏହାର ସୁଟିଂ ଆରମ୍ଭ ହୋଇପାରେ ବୋଲି ଚର୍ଚ୍ଚା ହେଉଛି। ଫିଲ୍ମର ପ୍ରିପ୍ରଡକ୍ସନ କାମ ଏବେ ଚାଲିଛି।
‘ଡନ୍-୩’ ରଣବୀରଙ୍କ କ୍ୟାରିୟରର ଏକ ବଡ଼ ଫିଲ୍ମ ହେବ ବୋଲି କୁହାଯାଉଛି। ରଣବୀର ଏବେ ଆଦିତ୍ୟ ଧରଙ୍କର ଏକ ଫିଲ୍ମର ସୁଟିଂରେ ବ୍ୟସ୍ତ ଅଛନ୍ତି। ସେହିଭଳି କିଆରା, ହ୍ରିତିକ୍ ରୋଶନ ଓ ଜୁନିୟର୍ ଏନ୍ଟିଆର୍ଙ୍କ ସହ ‘ୱାର୍-୨’ର ସୁଟିଂ କରୁଛନ୍ତି। ‘ଡନ୍-୩’ରେ ଫରହାନ୍ ଶାହାରୁଖ୍ ଖାନ୍ଙ୍କ ବଦଳରେ ରଣବୀରଙ୍କୁ ନେବାରୁ ଏଥିନେଇ ସାମାଜିକ ଗଣମାଧ୍ୟମରେ ଜୋରଦାର ସମାଲୋଚନାର ଶିକାର ହୋଇଥିଲେ।
