ଭୁବନେଶ୍ୱର, ୧୦ ମାର୍ଚ୍ଚ: ଭାରତୀୟ ନ୍ୟାୟ ସଂହିତା କାର୍ଯ୍ୟକାରିତାରେ ଓଡିଶା ପଛରେ ପଡିଥିବା ଅଭିଯୋଗ କରି ରାଜ୍ୟ ସରକାରଙ୍କୁ ତୀବ୍ର ସମାଲୋଚନା କରିଛି Biju Janata Dal (ବିଜେଡି)। ଗୃହ ବିଭାଗର ଦାୟିତ୍ୱରେ ଥିବା ମୁଖ୍ୟମନ୍ତ୍ରୀ Mohan Charan Majhi ନୈତିକ ଦାୟିତ୍ୱ ନେଇ ଇସ୍ତଫା ଦିଅନ୍ତୁ ବୋଲି ଦଳ ଦାବି କରିଛି।
ଆଜି ଭୁବନେଶ୍ୱରର ଶଙ୍ଖ ଭବନରେ ଆୟୋଜିତ ସାମ୍ବାଦିକ ସମ୍ମିଳନୀରେ ଦଳର ମୁଖପାତ୍ର ଓ ମିଡିଆ ସଂଯୋଜକ Lenin Mohanty କହିଥିଲେ ଯେ, ଭାରତୀୟ ନ୍ୟାୟ ସଂହିତା କାର୍ଯ୍ୟକାରୀ କ୍ଷେତ୍ରରେ ଜାତୀୟ ରାଙ୍କିଙ୍ଗରେ ଗତ ନଭେମ୍ବର ମାସରେ ଓଡିଶା ୧୪ତମ ସ୍ଥାନରେ ଥିଲା। କିନ୍ତୁ ମାତ୍ର ତିନି ମାସରେ ଏହା ୨୮ତମ ସ୍ଥାନକୁ ଖସି ଆସିଛି। ୨୦୨୬ ଫେବୃଆରୀର ରିପୋର୍ଟ ଅନୁଯାୟୀ ଜାତୀୟ ହାର ୬୦.୩୫ ଥିବାବେଳେ ଓଡିଶା ଏହାଠାରୁ ପ୍ରାୟ ୮ ପଏଣ୍ଟ ପଛରେ ରହିଛି।
ସେ କହିଥିଲେ ଯେ, ପୂର୍ବରୁ ୧୪ତମ ସ୍ଥାନରେ ଥିବା ଓଡିଶା ଉନ୍ନତି କରିବା ପରିବର୍ତ୍ତେ ମାତ୍ର ତିନି ମାସରେ ୧୪ଟି ରାଜ୍ୟର ପଛକୁ ଚାଲିଯିବା ରାଜ୍ୟ ପୋଲିସ ବ୍ୟବସ୍ଥାର ଅପାରଗତା ଓ ଗୃହ ବିଭାଗର ବିଫଳତାକୁ ପ୍ରକାଶ କରୁଛି।
ଡ଼ଃ ମହାନ୍ତି ଅଭିଯୋଗ କରିଥିଲେ ଯେ, ରାଜ୍ୟର ଆଇନ-ଶୃଙ୍ଖଳା ପରିସ୍ଥିତି ଦିନକୁ ଦିନ ବିପର୍ଯ୍ୟସ୍ତ ହେଉଛି। ବିଜେଡି ବାରମ୍ବାର ଏହାକୁ ନେଇ ସରକାରଙ୍କ ଧ୍ୟାନ ଆକର୍ଷଣ କରିଥିଲେ ମଧ୍ୟ କୌଣସି ପଦକ୍ଷେପ ନିଆଯାଇନାହିଁ।
ସେ ଆହୁରି କହିଥିଲେ ଯେ, ରାଜ୍ୟରେ ଜଣେ ଆଦିବାସୀ ମୁଖ୍ୟମନ୍ତ୍ରୀ ଥିବା ସହିତ ଗୃହ ବିଭାଗ ମଧ୍ୟ ତାଙ୍କ ଅଧୀନରେ ରହିଛି। ତଥାପି ଗତ ୧୮ ମାସରେ ଟ୍ରାଇବଲ ଆଟ୍ରୋସିଟି ମାମଲାରେ ବହୁତ ବୃଦ୍ଧି ଦେଖାଯାଇଛି। National Crime Records Bureau (ଏନସିଆରବି) ତଥ୍ୟ ଅନୁଯାୟୀ, ପୂର୍ବରୁ ଓଡିଶାରେ ଟ୍ରାଇବଲ ଆଟ୍ରୋସିଟି ମାମଲା ସଂଖ୍ୟା ୭୭୩ ଥିବାବେଳେ ଗତ ୧୮ ମାସରେ ଏହା ୨୪୮୩କୁ ବଢିଛି।
ଭାରତୀୟ ନ୍ୟାୟ ସଂହିତା କାର୍ଯ୍ୟକାରୀ ପ୍ରସଙ୍ଗରେ ପ୍ରକାଶିତ ରିପୋର୍ଟ ରାଜ୍ୟ ସରକାରଙ୍କ ଗୃହ ବିଭାଗର ବିଫଳତାକୁ ପ୍ରକାଶ କରୁଛି ବୋଲି ଦାବି କରି ମୁଖ୍ୟମନ୍ତ୍ରୀ ଶ୍ରୀ ମାଝୀ ନୈତିକ ଦାୟିତ୍ୱ ନେଇ ଇସ୍ତଫା ଦିଅନ୍ତୁ ବୋଲି ବିଜେଡି ପକ୍ଷରୁ ଦାବି କରାଯାଇଛି।
