ବଢି ବଢି ଚାଲିଛି କଲମ୍ବିଆ ଭୂକମ୍ପ ମୃତ୍ୟୁ ସଂଖ୍ୟା । କଲମ୍ବିଆ ଭୂମିକମ୍ପରେ ସରକାରୀ ଭାବେ ମୃତ୍ୟୁସଂଖ୍ୟା ୨୫୪କୁ ବୃଦ୍ଧି ପାଇଛି । ଅତିକମରେ ୨,୭୦୦ ଜଣ ନିଖୋଜ ଥିବାବେଳେ ୧,୬୦୦ଟି ଅଟ୍ଟାଳିକା କ୍ଷତିଗ୍ରସ୍ତ କିମ୍ବା ଧ୍ୱଂସ ହୋଇଛି । ସରକାର ସେନା, ପୋଲିସ, ଇଞ୍ଜିନିୟର, ଉଦ୍ଧାରକାରୀ ଦଳ ଓ ସନ୍ଧାନୀ କୁକୁରଙ୍କୁ ବ୍ୟାପକ ଭାବେ ମୁତୟନ କରିଛନ୍ତି । ପେରେଇରା ଓ କାଲିରେ ଲୁଟପାଟ ରୋକିବା ପାଇଁ ରାତ୍ରିକାଳୀନ କର୍ଫ୍ୟୁ ମଧ୍ୟ ଲାଗୁ କରାଯାଇଛି ।
ଧ୍ୱଂସାବଶେଷ ତଳେ ଜୀବିତ ଲୋକଙ୍କ ସନ୍ଧାନ ଜାରି ରହିଥିବାରୁ ମୃତାହତ ସଂଖ୍ୟା ଆହୁରି ବଢିପାରେ । ୨୭୦୦ରୁ ଅଧିକ ଲୋକ ନିଖୋଜ ଥିବାବେଳେ ସେମାନଙ୍କୁ ଉଦ୍ଧାର କରିବାକୁ ଜୋରଦାର ଉଦ୍ୟମ ଜାରି ରହିଛି । ଉଦ୍ଧାରକାରୀ ଦଳ, ସେନା, ରେଡକ୍ରସ୍ ଏବଂ ହଜାର ହଜାର ସ୍ଥାନୀୟ ସ୍ବେଚ୍ଛାସେବୀଙ୍କ ମିଳିତ ସହଯୋଗରେ ଦିନରାତି ଉଦ୍ଧାର କାର୍ଯ୍ୟ ଜାରି ରହିଛି । ଆଧୁନିକ ଯନ୍ତ୍ରପାତି ସହ ଲୋକେ ଖାଲି ହାତରେ ମଧ୍ୟ କଂକ୍ରିଟ୍ ଚଟାଣ ଖୋଳି ଜୀବନ ବଞ୍ଚାଇବାକୁ ଚେଷ୍ଟା କରୁଛନ୍ତି ।
ଭୂକମ୍ପ ଯୋଗୁ ବହୁ ଅଟ୍ଟାଳିକା,ଆବାସିକ ଘର ଭୁଶୁଡ଼ି ପଡ଼ିଛି । ଅନେକ ସହରରେ ବ୍ୟାପକ କ୍ଷୟକ୍ଷତି ଘଟିଛି । ଦେଶର ବଡ଼ ବଡ଼ ବିମାନବନ୍ଦର କ୍ଷତିଗ୍ରସ୍ତ ହୋଇଛି । କ୍ଷୟକ୍ଷତିର ଆକଳନ ପ୍ରକ୍ରିୟା ଜାରି ରହିଛି I ମେୟର ନାଗରିକମାନଙ୍କୁ ଧୈର୍ଯ୍ୟ ଧରିବାକୁ ଏବଂ କୋଠାରେ ବଡ଼ ଫାଟ ଦେଖାଗଲେ ତୁରନ୍ତ ସୁରକ୍ଷିତ ସ୍ଥାନକୁ ଚାଲିଯିବାକୁ ପରାମର୍ଶ ଦେଇଛନ୍ତି ।
ପଶ୍ଚିମ କଲମ୍ବିଆରେ ୭.୪ ରିକ୍ଟର ସ୍କେଲ୍ ତୀବ୍ରତାର ଭୂକମ୍ପ ଆସିଥିଲା । ଏହାର କେନ୍ଦ୍ରସ୍ଥଳ ଚୋକୋ ଅଞ୍ଚଳରେ ଥିବାବେଳେ ଭୂକମ୍ପ ପ୍ରଭାବ କଲମ୍ବିଆର ରାଜଧାନୀ ବଗୋଟା ସମେତ ପଡ଼ୋଶୀ ଦେଶରେ ମଧ୍ୟ ଦେଖିବାକୁ ମିଳିଛି ।
