ଜାତିସଂଘରେ କଶ୍ମୀର ପ୍ରସଙ୍ଗ ଉଠାଇଲା ପାକିସ୍ତାନ ଓ ତୁର୍କୀ, କଡ଼ା ଭାଷାରେ ଭାରତ ଦେଲା ଜବାବ – Sahana Mela

ନୂଆଦିଲ୍ଲୀ: ଜାତିସଂଘରେ କଶ୍ମୀର ପ୍ରସଙ୍ଗରେ ଭାରତ ପାକିସ୍ତାନ ଓ ତୁର୍କୀକୁ କଡ଼ା ସମାଲୋଚନା କରିଛି। ଜାତିସଂଘ ମାନବାଧିକାର ପରିଷଦର ୫୫ତମ ଅଧିବେଶନରେ ଭାରତ ତୁର୍କୀକୁ କଡ଼ା ସମାଲୋଚନା କରି କହିଛି ଯେ କଶ୍ମୀର ପ୍ରସଙ୍ଗରେ ଅନ୍ୟ କୌଣସି ଦେଶର ହସ୍ତକ୍ଷେପକୁ ବରଦାସ୍ତ କରାଯିବ ନାହିଁ। ଏହା ଭାରତର ଆଭ୍ୟନ୍ତରୀଣ ମାମଲା। ତୁର୍କୀ ଦେଇଥିବା ମନ୍ତବ୍ୟ ପାଇଁ ଆମେ ଦୁଃଖିତ।

ଭାରତର ସଚିବ ଅନୁପମା ସିଂହ ତୁର୍କୀର ବୟାନ ଉପରେ ପ୍ରତିକ୍ରିୟା ରଖି କହିଛନ୍ତି ଯେ ଏହା ଭାରତର ଆଭ୍ୟନ୍ତରୀଣ ମାମଲା ଏବଂ ଅନ୍ୟ କୌଣସି ଦେଶ ଏଥିରେ ହସ୍ତକ୍ଷେପ କରିବା ଉଚିତ ନୁହେଁ। ଅନୁପମା ସିଂ କହିଛନ୍ତି ଯେ ମୁଁ ଆନ୍ତରିକଭାବରେ ଆଶା କରୁଛି ଯେ ତୁର୍କୀ ଆମର ଆଭ୍ୟନ୍ତରୀଣ ବ୍ୟାପାରରେ ହସ୍ତକ୍ଷେପ କରିବ ନାହିଁ ଏବଂ କିଛି ମନ୍ତବ୍ୟ ଦେବାରୁ ଦୂରେଇ ରହିବ।

ସିଂହ କହିଛନ୍ତି ଯେ ଭାରତ ବିରୋଧରେ ଅଭିଯୋଗ ଆଣି ଏହି ମଞ୍ଚକୁ ପୁଣି ଥରେ ଅପବ୍ୟବହାର କରାଯାଇଛି। ଜମ୍ମୁ-କଶ୍ମୀର ଓ ଲଦାଖ ଭାରତର ଅବିଚ୍ଛେଦ୍ୟ ଅଙ୍ଗ। ସାମାଜିକ ବିକାଶ ସହିତ ଜମ୍ମୁ-କଶ୍ମୀରରେ ଅର୍ଥନୈତିକ ବିକାଶ ମଧ୍ୟ ହେଉଛି। ଏହାବ୍ୟତୀତ କେନ୍ଦ୍ରଶାସିତ ଅଞ୍ଚଳରେ ସୁଶାସନ ସୁନିଶ୍ଚିତ କରିବା ପାଇଁ ଭାରତ ସରକାରଙ୍କ ପକ୍ଷରୁ ସାମ୍ବିଧାନିକ ପଦକ୍ଷେପ ନିଆଯାଇଛି। ଏହା ଭାରତର ଆଭ୍ୟନ୍ତରୀଣ ମାମଲା।

ମିଳିତ ଜାତିସଂଘର ସାଧାରଣ ସଭାରେ ତୁର୍କୀ କହିଥିଲା ଯେ ଦକ୍ଷିଣ ଏସିଆରେ ଶାନ୍ତି, ସ୍ଥିରତା ଏବଂ ବିକାଶ ପାଇଁ କଶ୍ମୀରରେ ନ୍ୟାୟ ସହ ଶାନ୍ତି ଅତ୍ୟନ୍ତ ଗୁରୁତ୍ୱପୂର୍ଣ୍ଣ । ୟୁଏନଏଚଆରସିରେ ତୁର୍କୀର ଏହି ବୟାନକୁ ଭାରତ କଡା ପ୍ରତିକ୍ରିୟା ଦେଇଛି।

ପାକିସ୍ତାନକୁ ସମାଲୋଚନା କରି ଭାରତ କହିଛି, ଯେଉଁ ଦେଶ ନିଜ ଦେଶର ସଂଖ୍ୟାଲଘୁଙ୍କ ବିରୋଧରେ ନିଷ୍ଠୁର ଆଚରଣ କରିବ, ସେ ଭାରତ ଉପରେ କ’ଣ ଅଭିଯୋଗ ଆଣିବ। ପାକିସ୍ତାନକୁ ଟାର୍ଗେଟ କରି ଭାରତ କହିଛି ଯେ ଆତଙ୍କବାଦୀଙ୍କୁ ଆଶ୍ରୟ ଦେଉଥିବା ଏକ ଦେଶର ମନ୍ତବ୍ୟ, ଯାହାର ମାନବିକ ଅଧିକାର ରେକର୍ଡ ବାସ୍ତବରେ ଖରାପ, ଏହା କେବଳ ବିଡ଼ମ୍ବନା ନୁହେଁ ବରଂ ବିକୃତ ମଧ୍ୟ।

ଭାରତ ଆହୁରି ମଧ୍ୟ କହିଛି ଯେ, ଯେଉଁ ଦେଶ ନିଜେ ଆର୍ଥିକ ଅସୁବିଧାର ଶିକାର ହୋଇଛି, ସେଥିପ୍ରତି ଆମେ ବିଶେଷ ଧ୍ୟାନ ଦେଉନାହୁଁ। ଭାରତ କହିଛି ଯେ ଯେଉଁ ଦେଶ ଖାଦ୍ୟ ଅଭାବର ସମ୍ମୁଖୀନ ହେଉଛି, ଯାହାର ବାଲାନ୍ସ ସିଟ୍ ଖରାପ, ଆମେ ସେହି ଦେଶ ଉପରେ ଅଧିକ ଧ୍ୟାନ ଦେଇପାରିବୁ ନାହିଁ।