ଓ୍ୱାର୍ରୁ ଓ୍ୱାର୍କ ଫ୍ରମ୍ ହୋମ୍। ଭିସାରୁ ଅନୁପ୍ରବେଶକୁ ଅଙ୍କୁଶ ଯାଏଁ। ଆମେରିକାର କ୍ଷମତା ଡୋରି ଧରିବା ପରେ ଟ୍ରମ୍ପଙ୍କ ଅନେକ ନିଷ୍ପତ୍ତିକୁ ନେଇ ଆଶା ଯେତିକି, ସେତିକି ଆଶଙ୍କାର ବାଦଲ ବି ଘୋଟିଲାଣି। ୟୁକ୍ରେନ୍ ଓ ଋଷ ଭିତରେ ଯୁଦ୍ଧକୁ ୨୪ ଘଣ୍ଟାରେ ବନ୍ଦ କରିଦେବେ। ଏ ପରିପ୍ରେକ୍ଷୀରେ ଦେଇଥିବା ମନ୍ତବ୍ୟ ଏବେ ବିବାଦ ରୂପ ନେଲାଣି। ଦୁଇ ଦେଶ ଭିତରେ ଯୁଦ୍ଧ ୩ ବର୍ଷ ପୁରା କରିବାକୁ ଯାଉଛି। ଋଷ୍ ରାଷ୍ଟ୍ରପତି ଭ୍ଲାଦିମିର ପୁଟିନ ଯଦି ଆପୋଷ ସମାଧାନ ବୈଠକକୁ ଆସିବେନି, ତାହେଲେ ଋଷିଆକୁ ବ୍ୟାନ୍ କରିଦେବି ବୋଲି କହିଲେଣି ଟ୍ରମ୍ପ। ତେବେ କେଉଁ ପ୍ରକାର ପ୍ରତିବନ୍ଧକ ଲଗାଯିବ, ତାହାର ସ୍ପଷ୍ଟତା ଆସିନି। ଏମିତିରେ ଯୁଦ୍ଧକୁ ନେଇ ଋଷ ଉପରେ ଆମେରିକା ଅନେକ ପ୍ରତିବନ୍ଧକ ଲଗାଇସାରିଛି। ଚୀନ୍ ରାଷ୍ଟ୍ରପତି ସି ଜିନପିଙ୍ଗଙ୍କ ହସ୍ତକ୍ଷେପ ବି ଲୋଡ଼ିଛନ୍ତି ଟ୍ରମ୍ପ୍। ସେପଟେ ପୁଟିନ୍ କହିଛନ୍ତି, ସେ କଥାବାର୍ତ୍ତା କରିବାକୁ ରାଜି ଅଛନ୍ତି। ସବୁବେଳେ ଆଲୋଚନା ଜରିଆରେ ଶାନ୍ତି ପ୍ରତିଷ୍ଠା ଦିଗରେ ସେ ଆଗେଇ ଆସିଛନ୍ତି। ତୃତୀୟ ବିଶ୍ୱଯୁଦ୍ଧ କରାଇବାକୁ ଦେବିନି ବୋଲି ଟ୍ରମ୍ପଙ୍କ ମନ୍ତବ୍ୟକୁ ସମର୍ଥନ କରିଛନ୍ତି ପୁଟିନ୍। ୟୁକ୍ରେନ୍ ରାଷ୍ଟ୍ରପତି ଜେଲେନେସ୍କିଙ୍କ ସହ ସମ୍ପର୍କରେ ଅଛି ଆମେରିକା ସରକାର ବୋଲି କହିଛନ୍ତି ଟ୍ରମ୍ପ୍। ଯୁଦ୍ଧ ବେଳେ ୟୁକ୍ରେନକୁ ଯୁଦ୍ଧ ଉପକରଣ ପଠାଇଥିଲା ଆମେରିକା।
ଏ ତ ଗଲା ଓ୍ୱାର୍ କଥା। ଓ୍ୱାର୍କ ଫ୍ରମ୍ ହୋମକୁ ନେଇ ଟ୍ରମ୍ପ୍ ଅଙ୍କୁଶ ଲଗାଇବା ପରେ ଏବେକାର ସ୍ଥିତି କଅଣ ହେବ। କାରଣ ସରକାରୀ କର୍ମଚାରୀଙ୍କୁ ଏବେ ଫୁଲ୍ ଟାଇମ ଅଫିସରେ କାମ କରିବାକୁ ପଡ଼ିବ। କୋଭିଡ୍ ସମୟରୁ ଓ୍ୱାର୍କ ଫ୍ରମ୍ ହୋମ ବ୍ୟବସ୍ଥା ଏ ଯାଏ ବଳବତ୍ତର ଥିଲା। ଆଉ ଏହାକୁ ଫ୍ଲେକ୍ସିବୁଲ ଓ୍ୱାର୍କ ମଡେଲ ଭାବେ ଧରିନେଇଥିଲେ କର୍ମଚାରୀ। କେବଳ ୬ ପ୍ରତିଶତ ସରକାରୀ କର୍ମଚାରୀ ଅଫିସ ଆସି କାମ କରୁଥିଲେ। ଟ୍ରମ୍ପଙ୍କ ଏହି ନିଷ୍ପତ୍ତି ପରେ ଆମାଜନ, ଡିସନି, ଡେଲ୍, ଜୁମ୍, ଜେପି ମୋର୍ଗାନ, ସ୍ନାପଚାଟ୍, ଉବର, ଟ୍ୱିଟର, ଷ୍ଟାରବକ୍ସ, ଓ୍ୱାଲମାର୍ଟ ଭଳି ପ୍ରାଇଭେଟ୍ କମ୍ପାନୀ ଓ୍ୱାର୍କ ଫ୍ରମ ହୋମ୍ ବ୍ୟବସ୍ଥା ବନ୍ଦ କରିଦେଇଛନ୍ତି। ଆଉ ସବୁଠୁ ବଡ଼ ନିଷ୍ପତ୍ତି ବେଆଇନ ଇମିଗ୍ରେସନ ଉପରେ ରୋକ୍ ଲାଗିବା ପରେ ୭ଲକ୍ଷରୁ ଉର୍ଦ୍ଧ୍ୱ ଭାରତୀୟ ଏବେ ବିପଦରେ। ୭ଲକ୍ଷ ୨୫ହଜାର ଭାରତୀୟଙ୍କ ସମେତ ୧୪ ନିୟୁତ ଦସ୍ତାବିଜ୍ ବିହୀନ ପ୍ରବାସୀ ଏବେ ଭୟଭୀତ। ଅବୈଧ ବ୍ୟକ୍ତିଙ୍କୁ ପ୍ରତ୍ୟର୍ପଣ କରି ଆମେରିକା ସୀମାକୁ ସୁଦୃଢ଼ ଦିଗରେ ଏଭଳି ପଦକ୍ଷେପ ଘୋଷଣା କରିଛନ୍ତି ଟ୍ରମ୍ପ। ବେଆଇନ ଭାବେ ପ୍ରବେଶ କରିଥିବା ୧୮ହଜାର ଭାରତୀୟ ନାଗରିକଙ୍କୁ ଉଭୟ ଦେଶ ଚିହ୍ନଟ କରିଥିବାରୁ ସେମାନଙ୍କୁ ଫେରାଇ ଆଣିବାକୁ ଭାରତ ବି ପ୍ରସ୍ତୁତ ବୋଲି ଜଣାଇସାରିଛି। ଏଚଓ୍ୱାନ-ବି ଭିସା ରଦ୍ଦ ଉପରେ ଟ୍ରମ୍ପ କହିଛନ୍ତି, ଗୁଣାବତ୍ତା ଥିବା ଲୋକଙ୍କୁ ଦେଶକୁ ଆଣିବାକୁ ପଡ଼ିବ। କେବଳ ଇଞ୍ଜିନିୟରିଂ କ୍ଷେତ୍ର ନୁହେଁ, ବରଂ ସବୁ କ୍ଷେତ୍ରରେ ଏହାର ଆବଶ୍ୟକତା ଅଛି। ଏମିତି କଲେ ଆମେରିକାର ବାଣିଜ୍ୟ ସମୃଦ୍ଧ ହେବ। ତେବେ ଏଚଓ୍ୱାନ-ବି ଭିସାକୁ ନେଇ ଏତେ କଠୋର ହୋଇନପାରନ୍ତି ଟ୍ରମ୍ପ୍। ଯୋଗ୍ୟତା ମାପଦଣ୍ଡରେ ସାମାନ୍ୟ ପରିବର୍ତ୍ତନ କରିପାରନ୍ତି। ଭାରତକୁ ବଡ଼ କ୍ଷତି ସହିବାକୁ ପଡ଼ି ନପାରେ। କାରଣ ପ୍ରଫେସନାଲ ଦୁନିଆର ତମାମ କ୍ଷେତ୍ରରେ ଭାରତର ନାଁ ବେଶ୍ ଅଛି। ଟ୍ରମ୍ପ ସରକାରର ଏମିତି କିଛି ନିଷ୍ପତ୍ତି ଯୁଦ୍ଧ ମନୋବୃତ୍ତିଧାରୀ ଋଷର ଆଭିମୁଖ୍ୟକୁ ବଦଳାଇପାରିବ କି। ମେକ୍ସିକୋ ଓ ସାଲଭାଡ଼ୋରାନ୍ସ ପରେ ଆମେରିକୀୟ ଅବୈଧ ପ୍ରବାସୀଙ୍କ ଭିତରେ ତୃତୀୟ ବୃହତ୍ତମ ଗୋଷ୍ଠୀ ଭାରତୀୟଙ୍କ ଉପରେ ଏହାର କି ପ୍ରଭାବ ପଡ଼ିବ। ଏ ତମାମ ପ୍ରଶ୍ନର ଉତ୍ତର ଏବେ ବି ଅସମାହିତ।
