ଛୋଟବେଳୁ ଆମେ ବଡ଼ମାନଙ୍କଠାରୁ ଶୁଣିଆସୁଛୁ ଯେ, ବିଲେଇ ରାସ୍ତା କାଟିଦେଲେ ୧୦ ମିନିଟ୍ ଅପେକ୍ଷା କରି ପରେ ଯିବା ଉଚିତ୍ । ଶକୁନ ଶାସ୍ତ୍ରରେ ମଧ୍ୟ ବିଲେଇ ରାସ୍ତା କାଟିବାକୁ ଏକ ପୁରୁଣା ଏବଂ ପ୍ରଚଳିତ ଶୁଭ-ଅଶୁଭ ସଙ୍କେତ ବୋଲି ମନାଯାଏ । କିନ୍ତୁ ଏହା ପଛରେ କେବଳ ଅନ୍ଧବିଶ୍ୱାସ ନୁହେଁ, ପୁରୁଣା ସମୟର କିଛି ବ୍ୟବହାରିକ କାରଣ ମଧ୍ୟ ରହିଛି । ଶକୁନ ଶାସ୍ତ୍ର ଅନୁସାରେ, ବିଶେଷକରି କଳା ବିଲେଇ ରାସ୍ତା କାଟିଲେ ଏହାକୁ ଅଶୁଭ ବା ଆଗାମୀ କୌଣସି ସମସ୍ୟାର ସଙ୍କେତ ବୋଲି ଧରାଯାଏ ।
ଜ୍ୟୋତିଷ ଶାସ୍ତ୍ରରେ ବିଲେଇକୁ ରାହୁ ଗ୍ରହ ସହ ଜଡ଼ିତ ପ୍ରାଣୀ ବୋଲି ମନାଯାଏ । ରାହୁଙ୍କୁ ଦୁର୍ଘଟଣା, ବାଧା ଏବଂ ନକାରାତ୍ମକ ଶକ୍ତିର କାରକ ବୋଲି କୁହାଯାଏ । ସେଥିପାଇଁ ବିଶ୍ୱାସ କରାଯାଏ ଯେ, ବିଲେଇ ରାସ୍ତା କାଟିଲେ ଆପଣଙ୍କ କାମରେ ବାଧା ଆସିପାରେ । କିଛି ମାନ୍ୟତା ଅନୁସାରେ, ବିଲେଇ ବାମ ପଟରୁ ଡାହାଣ ପଟକୁ ରାସ୍ତା କାଟିଲେ ଏହାକୁ ଅଧିକ ଅଶୁଭ ମନାଯାଏ । ଯଦି ଆପଣ କୌଣସି ଜରୁରୀ କାମରେ ବାହାରୁଛନ୍ତି ଏବଂ ସେହି ସମୟରେ ବିଲେଇ ରାସ୍ତା କାଟିଦିଏ, ତେବେ ସେହି କାମରେ ବିଳମ୍ବ କିମ୍ବା ଅସଫଳତା ଆସିପାରେ ବୋଲି ବିଶ୍ୱାସ ରହିଛି ।
କେବଳ ରାସ୍ତା କାଟିବା ନୁହେଁ, ଯଦି ଘର ଭିତରେ କିମ୍ବା ଘର ପାଖରେ ବିଲେଇମାନେ ଝଗଡ଼ା କରୁଛନ୍ତି କିମ୍ବା ସେମାନଙ୍କ କାନ୍ଦିବା ଶବ୍ଦ ଶୁଣାଯାଏ, ତେବେ ଶକୁନ ଶାସ୍ତ୍ରରେ ଏହାକୁ ଘରେ କଳହ କିମ୍ବା ଧନହାନିର ସଙ୍କେତ ବୋଲି କୁହାଯାଏ । ଯଦି ବିଲେଇ ଆପଣଙ୍କ ସାମ୍ନାରେ ଛିଙ୍କିଦିଏ, ତେବେ ଏହାକୁ ମଧ୍ୟ ଅଶୁଭ ବୋଲି ମନାଯାଏ । ଏପରି ସ୍ଥିତିରେ କିଛି ସମୟ ଅପେକ୍ଷା କରି ପରେ ଯାତ୍ରା ଆରମ୍ଭ କରିବାକୁ ପରାମର୍ଶ ଦିଆଯାଏ ।
ବିଲେଇ ରାସ୍ତା କାଟିଦେଲେ କଣ କରିବେ?
ଯଦି ଆପଣ ଏହି ମାନ୍ୟତାକୁ ବିଶ୍ୱାସ କରନ୍ତି କିମ୍ବା ମନରେ ସନ୍ଦେହ ଆସେ, ତେବେ ଲୋକପରମ୍ପରାରେ କିଛି ସହଜ ଉପାୟ କୁହାଯାଇଛି। ଯାହା ହେଉଛି- ରାସ୍ତା କାଟିଦେଲେ ଏକ କିମ୍ବା ଦୁଇ ମିନିଟ୍ ସେଠାରେ ଅପେକ୍ଷା କରନ୍ତୁ । ଶକୁନ ଶାସ୍ତ୍ର ଅନୁସାରେ, ଆପଣଙ୍କ ପରେ ଯଦି ଅନ୍ୟ କୌଣସି ବ୍ୟକ୍ତି କିମ୍ବା ଗାଡ଼ି ସେହି ରାସ୍ତା ଦେଇ ଯାଏ, ତେବେ ଅଶୁଭ ପ୍ରଭାବ ଦୂର ହୋଇଯାଏ ବୋଲି ବିଶ୍ୱାସ ରହିଛି । ପାଖରେ ପାଣି ଥିଲେ ଅଳ୍ପ ପାଣି ତଳେ ଛିଞ୍ଚନ୍ତୁ କିମ୍ବା ଅଳ୍ପ ପାଣି ପିଇ ତା’ପରେ ଯାତ୍ରା କରନ୍ତୁ। ନିଜ ଇଷ୍ଟଦେବଙ୍କୁ ସ୍ମରଣ କରନ୍ତୁ କିମ୍ବା ହନୁମାନ ଚାଳିଶାର ଗୋଟିଏ ପଙ୍କ୍ତି ପାଠ କରନ୍ତୁ । ଏହାଦ୍ୱାରା ମନର ଭୟ ଏବଂ ନକାରାତ୍ମକ ଚିନ୍ତା ଦୂର ହୁଏ ବୋଲି ବିଶ୍ୱାସ କରାଯାଏ ।
