[ad_1]
ଭୁବନେଶ୍ୱର: ନିର୍ବାଚନ ଆସନ୍ନ ବେଳେ ବିଜେଡି ସରକାରର ‘ଯୁବ ଓଡ଼ିଶା ନବୀନ ଓଡ଼ିଶା’ କାର୍ଯ୍ଯକ୍ରମକୁ ନେଇ ସାରା ଓଡ଼ିଶାର କଲେଜଗୁଡ଼ିକରେ ବିବାଦ ତେଜିବାରେ ଲାଗିଛି। ଛାତ୍ରଛାତ୍ରୀମାନେ ଅଭିଯୋଗ କରିଛନ୍ତି ଯେ ଏହି ଯୋଜନାକୁ ବିଜେଡିର ପ୍ରଚାର ପାଇଁ ବ୍ୟବହାର କରୁଛି ଏବଂ ସେମାନଙ୍କ କଲେଜକୁ ଦଳୀୟ କାର୍ଯ୍ୟାଳୟରେ ପରିଣତ କରାଯାଉଛି।
ମୟୂରଭଞ୍ଜ ଜିଲ୍ଲା ବାରିପଦାରେ ଥିବା ଏମପିସି ସ୍ୱୟଂଶାସିତ ମହାବିଦ୍ୟାଳୟର ଛାତ୍ରଛାତ୍ରୀମାନେ ମହାବିଦ୍ୟାଳୟର ମୁଖ୍ୟ ଫାଟକରେ ତାଲା ପକାଇ କଲେଜ କର୍ତ୍ତୃପକ୍ଷଙ୍କ ବିରୋଧରେ ବିକ୍ଷୋଭ ପ୍ରଦର୍ଶନ କରିଛନ୍ତି।
ବାଲେଶ୍ୱରର ଫକୀର ମୋହନ ସ୍ୱୟଂଶାସିତ ମହାବିଦ୍ୟାଳୟର ଛାତ୍ରଛାତ୍ରୀମାନେ ମଧ୍ୟ ଏହି କାର୍ଯ୍ୟକ୍ରମକୁ ନେଇ ଚିନ୍ତା ପ୍ରକଟ କରିଛନ୍ତି। ସେମାନେ ଅଭିଯୋଗ କରିଛନ୍ତି ଯେ କଲେଜ କ୍ୟାମ୍ପସରେ ବିଜେଡିର ପୋଷ୍ଟର ଓ ବ୍ୟାନର ଲାଗିଛି, ବିଜେଡି ନେତାମାନେ କାର୍ଯ୍ୟକ୍ରମରେ ଯୋଗ ଦେଉଛନ୍ତି। ଏହା ଏକ ଶୈକ୍ଷିକ ବାତାବରଣକୁ ଖରାପ କରୁଛି।
ବିଜେଡି ସରକାର ଯୁବ ଭୋଟରଙ୍କୁ ନିଜ ଆଡକୁ ଆକୃଷ୍ଟ କରିବା ପାଇଁ ଏହି ଯୋଜନା କରିଥିବା ଅଭିଯୋଗ ଆଣିଛନ୍ତି ବିରୋଧୀ ବିଜେପି ଓ କଂଗ୍ରେସ।
ବିଜେଡିର ବ୍ୟାନର ଓ ପୋଷ୍ଟର ଧରି କାର୍ଯ୍ୟକ୍ରମ ଆୟୋଜନ କରାଯାଉଛି। ଯୁବପିଢ଼ିଙ୍କୁ ବିଭ୍ରାନ୍ତ କରାଯାଉଛି। ବିଜେପି ସାଂସଦ ପ୍ରତାପ ଷଡ଼ଙ୍ଗୀ ଅଭିଯୋଗ କରିଛନ୍ତି ଯେ ରାଜନୈତିକ ପ୍ରଚାରରେ ଯୁବକମାନଙ୍କୁ ବ୍ୟବହାର କରିବା ପାଇଁ ସରକାରୀ ଅର୍ଥର ଅପବ୍ୟବହାର କରାଯାଉଛି।
କଂଗ୍ରେସ ନେତା ଅଧିରାଜ ପାଣିଗ୍ରାହୀ କହିଛନ୍ତି, ଯଦି ଏହା ଏକ ସରକାରୀ କାର୍ଯ୍ୟକ୍ରମ ତେବେ ସବୁ ଦଳର ନେତାଙ୍କୁ ନିମନ୍ତ୍ରଣ କରାଯିବା ଉଚିତ। ଏହା ବଦଳରେ ଏକ ନିର୍ଦ୍ଦିଷ୍ଟ ରାଜନୈତିକ ଦଳର ନେତାଙ୍କୁ କାର୍ଯ୍ୟକ୍ରମକୁ ନିମନ୍ତ୍ରଣ କରାଯାଉଛି। ଏଥିରୁ ଛାତ୍ରଛାତ୍ରୀଙ୍କୁ କେଉଁ ଦିଗକୁ ଚାଲାଣ କରାଯାଉଛି ତାହା ସହଜରେ ଅନୁମେୟ। ଯୁବ ଭୋଟରଙ୍କୁ ବିଭ୍ରାନ୍ତ କରି ନିଜ ଆଡକୁ ଟାଣିବାକୁ ଚେଷ୍ଟା କରିବା ଅତ୍ୟନ୍ତ ଦୁର୍ଭାଗ୍ୟଜନକ।
ଉଚ୍ଚଶିକ୍ଷା ମନ୍ତ୍ରୀ ଅତନୁ ସବ୍ୟସାଚୀ ନାୟକ ଏହି କାର୍ଯ୍ୟକ୍ରମକୁ ସମର୍ଥନ କରି କହିଛନ୍ତି ଯେ, ଏହା ରାଜନୀତି ସହ ଜଡିତ ନୁହେଁ ଏବଂ ଏହା ଛାତ୍ରଛାତ୍ରୀଙ୍କ ପାଇଁ ଉଦ୍ଦିଷ୍ଟ। ‘ଯୁବ ଓଡ଼ିଶା ନବୀନ ଓଡ଼ିଶା’ ଜରିଆରେ ପ୍ରତ୍ୟେକ କଲେଜକୁ ୯ ଲକ୍ଷ ଟଙ୍କା ଲେଖାଏଁ ପାଣ୍ଠି ଦିଆଯାଇଛି। ଏହି ଅର୍ଥରେ କଲେଜଗୁଡ଼ିକ କ୍ରୀଡ଼ା ଓ ସାଂସ୍କୃତିକ କାର୍ଯ୍ୟକ୍ରମ ଆୟୋଜନ କରୁଛନ୍ତି। ଏହି କାର୍ଯ୍ୟକ୍ରମ ନଭେମ୍ବର ୧୫ରୁ ଆରମ୍ଭ ହୋଇ ଡିସେମ୍ବର ୩୧ ଯାଏଁ ବ୍ଲକ ସ୍ତରରେ ଚାଲିବ।
[ad_2]
